我看員工50戒

“The history of all hitherto existing society is the history of class struggles” Communist Manifesto
馬克思這句話未必全對，但的確道破了不少事情的實況。大至札鐵工人，小至辦公室內小職員和老板的關係都是漫長的struggle。總之，就是處於你衰格時我又夠仆街的狀態。

看到老板渣估舊作「員工50戒」，實在獲益不少，至少我知道我天天都在搏炒中。不過，從一個仆街員工的角度，又會怎樣看這50戒呢？
(其實渣老板對員工已算寬宏了，如果我是老細，我絕對是超級刻薄寡恩，員工當義工的那一種)

1. 你老闆真金白銀買起左你朝九晚五既時段, 唔該係呢段時間內萬事以公司行先。
是的，所以我每天都有服刑，沒有棄保潛逃。

2. 你老闆唔介意你係公司講私人電話, 亦唔會設限, 但請你自重, 每日唔好多過一分鐘。
我不太喜歡講電話，但是如果我講電話就是為了維持工作士氣，拉長條命為公司打拼，是「以公司行先」之舉。

3. 你老闆珍重你既尊嚴, 但朝早同我狹路相逢既話, 請你主動先講早晨
弊！幾時見到大老板都是無反應……..亦有其他部門的同事以為我是啞和患自閉症的。

4. 你老闆絕對介意你上班時間做私人野, 如非老婆鬧離婚, 或條仔要自殺, 私人電郵同電話, 唔該放工至處理
同樣，做私事就是為了維持工作士氣，拉長條命為公司打拼，是「以公司行先」之舉。

5. 你老闆鍾意同事們外表出眾, 男唔該剃鬚, 女唔該化妝
我記得就會剃的。其實，如果是外表出眾，剃唔剃鬚，化唔化妝都會出眾。當然，如果是奇醜的，加不加修飾……也是同樣出眾

6. 你老闆鍾意同事們外表出眾, 但男同事唔該唔駛袖口鈕, 搞到你似老細多過我。
所以我從來唔打tie

7. 你老闆鍾意同事們外表出眾, 但女同事唔該唔駛日日行fashion show, 你咁會令其他女同事好大壓力
這個我無能為力。但我想指出，呀老細你請回來的女員工的樣子使我被逼專心對住個電腦工作，也是很大壓力，使我抑鬱。

8. 你老闆冇乜潮流觸覺, 但都唔好MK look 返工, 雖然公司係佐敦, 同MK 都好近
我無MK look ，只有PK look

9. 你老闆鍾意員工有手尾, 唔好要我再問 “邊個茂七又唔放番好條 toilet key?”
求人不如求己……自己配條私家key 啦

10. 你老闆唔鍾意浪費, 唔該剩得你開O.T. 時, 冇人既地區幫手熄燈關冷氣
現在的工作地點有「阿叔」處理這問題。其實，這是員工對公司滿意度的反映，即他們可能不滿老細，而在OT時開爆冷氣，等你加電費。

11. 你老闆叫你做野, 唔好話"呢d野唔係我跟開個喎”, 叫你做就做
我絕對是順民。講真，如有人給我百萬年薪我可以叫佢做契哥 / 契姐，千萬年薪我認佢做老豆 / 老母都得。

12. 你老闆好易話為, 有野唔好擺係心, 約我放工後去 pub 傾
我都好易話為，有野最好在工作時落pub傾，放工就要專心放工。

13. 你老闆尊重信仰自由, 但最好唔好帶佛珠手鍊返工
我唔信佛的。不過，可能人家帶佛珠都是想佛祖保佑公司，萬事大吉。

14. 你老闆有時會爆粗, 如非禍及令壽堂, 請骨聲吞左佢
唔緊要，唔緊要。員工都會爆粗，如非禍及令壽堂, 請骨聲吞左佢。莫講話小老味，如有人給我百萬年薪我可以叫佢做契哥 / 契姐，千萬年薪我認佢做老豆 / 老母都得。

15. 你老闆有時會爆粗, 如果禍及令壽堂, 一定係你聽錯
唔緊要，唔緊要。員工都會爆粗，如果禍及令壽堂, 一定係你聽錯。莫講話小老味，如有人給我百萬年薪我可以叫佢做契哥 / 契姐，千萬年薪我認佢做老豆 / 老母都得。

16. 你老闆貴人善忘, 有乜野講過唔記得, 唔該有禮貌咁提番我
弊…..我會聽過唔記得的

17. 你老闆有時扮貴人善忘, 提完我又唔跟進的話, 唔該忘記佢把啦
弊…..我會講完唔記得

18. 你老闆鍾意低調, 唔該收埋你地d Explorer 同 Cartier
這不是員工的問題，而是薪金的問題。我老細在我的薪酬上作長期緊縮政策，於是我只有Internet Explorer而沒有Explorer

19. 你老闆雖然咸濕, 但女同事都唔好係我面前烏低身執野, (只係) 咁做係唔會加人工既
來我公司吧，這兒的女同事無論弄出甚麼姿勢，你都唔想咸濕。

20. 你老闆鍾意自動自覺有承擔, 水機冇水時, 男同事唔駛人叫, 自動請纓啦
水機就在我前面呀….嗚嗚嗚

21. 你老闆畏高, 光管斬斬下, David 又出左街, 男人們, 做個男人換左佢
好彩我地有阿叔

22. 你老闆雖然後生, 但都係一個"古老人", 就算我已經見到你係門口, 入房前唔該敲兩野度門
我通常都有做

23. 你老闆忙緊既時候又有客到, Sarah 又行開左, 唔該主動招呼個客坐下, 唔好掂行掂過, 當個客冇到, 分分鐘係公司大客
好彩我暫時未要接客

24. 你老闆實行遲到扣錢制, 都係因為我認同性惡論, 唔扣錢的話, 準時返工既同事就會覺得自己好戇居
以前間pk 野行這類制度，加上種種積怨，於是d人會寧願長期遲到，早則九點，遲則十點返，扣錢都唔準時(官方是8時半要報到)。刑法是應行，但有時是「民不畏死，奈何以死懼之」

25. 你老闆 IQ 唔高, 但未致於白痴, 唔好穫穫都請埋d 星期一同星期五既病假
一星期工作四天，四天都以公司為先，到第五天怎會不倒下(大市連升四日都要調整一下啦)，倒下來又怎能一兩天就能回復四天的消耗(調整怎會是一兩天完成)。告假是要為公司走更長的路。

26. 你老闆英明神武, 你住灣仔竟然遞交上水既醫生紙, 你仲唔係返深圳 fing 頭黎?
我無。不過，老細可留意我的醫生紙有兩種……cheap cheap醫療機構的就是假病的，果張好多文憑醫生的醫生紙就是真係病到仆街的。

27. 你老闆收工後打俾你, 肯定有野要救命, 睇緊戲都要接聽, 千祈唔可以飛call 台
我唔係太鐘意講電話。如前述講電話都只為提高士氣，收工了，有士氣都無用，我自然唔會聽。

28. 你老闆叫你去東, 千祈唔好去西, 唔好質疑你老闆既決定
無問題。不過，有時我會去東北偏東。

29. 你老闆鍾意公司安靜, 同事嗌交, 唔該落街
我都愛好和平的，上有好者，下必甚焉

30. 你老闆有時扮遲鈍, 隻眼開時隻眼閉, 打工仔咪得寸進尺
水至清則無魚，謝主隆恩！

31. 你老闆同你開會, 唔該點都帶紙筆入黎, 有冇重點都扮寫下野, 你一碌木時, 我會好冇安全感
弊…….我只帶一顆侍主的忠心，其他紙筆野就長期唔帶tim

32. 你老闆間中會巡下你地既工作間, d 東周壹仔唔該睇完就拎返屋企, 唔好將工作間變報攤
這是工作量的問題，老細安排的工作量多，就無時間睇甚麼周刊，工作間只有員工死而後已的屍骨……我個工作間己變成亂葬岡。因此有周刊在工作間反映老細對員工的體恤。

33. 你老闆最憎見到電話響冇人聽, 就算同事行開左, 幫佢take message 係唔會七孔流血死的
君子不在其位，不謀其政

34. 你老闆如果發現你做危害公司安全既事情, 證據確鑿的話, 可能會搵人先打到你爆缸, 再報警
能為公司爆缸，謝主隆恩

35. 你老闆生日好易記, 冇夾生日蛋糕, 係咁咦夾份買張生日咭都得卦? 否則年底冇bonus
如果bonus夠大，認你做老豆 / 老母，送父親節、母親節卡都得

36. 你老闆好想俾多d員工福利, 但最好唔駛太多錢, 有乜建議即管開聲
老細顧慮周詳，算無遺策，謝主隆恩

37. 你老闆時間觀念強, 如非返學考試, 或世界鞠躬, 可唔可以唔搭正五點就鬆人?
我已經OT O到O晒咀啦！正如黃子華說你帶撈，我帶精工，大家時間觀念都不同，是很難溝通的。因此這不是時間觀念的問題，而是你這老細之錶有問題，較下佢就無事。

38. 你老闆唔介意辦工室情緣, 但耍花窗唔該收工先, 搞野都係
這是老細請人或人事部的問題，如果聘請我間公司的女同事，或者如我公司般對女同事外貌作極端嚴格的評審挑選，就不會發生這類問題。(或者請我這類又啞又自閉又有pk look的男員工亦可)

39. 你老闆都知郵票唔值錢, 但盡可能唔好公器私用, 我唔介意你同公司買個四 ($1.4) 郵票
我通常用公司電腦check mail

40. 你老闆尊重你慢性自殺既自由, 但食煙唔該去樓梯間, 同埋唔好太密, 每日唔好多過一枝
謝主隆恩！少食。

41. 你老闆尊重你個人品味, 但請在考慮穿環同紋身前同我單聲, 我好可能叫你離職後至咁做
放心。我怕痛。

42. 你老闆認同誠實重要, 但叫你呃打電話黎既人, 話聲老細出去開會未返, 唔該你都照做
我忠心侍主，話「老細去佐叫雞 / 搞野 / 打仔 / 著草 未番」都得。

43. 你老闆唔介意你工作走捷徑, 但介意你發現有捷徑行都唔教曉班同事
欲成驚人藝，必下死功夫。

44. 你老闆唔識分你閉目時係為工作沉思定偷懶, 係前者的話唔該你將沉思內容唸出聲
不是沉思也不是愉懶，而是重整軍力，再建士氣，為公司走更長的路，打更硬的仗

45. 你老闆期望文件經過 spell check 至出街, 唔好再 “embarassing”, 因為好 embarrassing
所以我打中文

46. 你老闆期望文件出街前仲要經過肉眼檢定, 唔好 Wanchai 變 Chaiwan
忙中有錯，無法子。少d野做就少d錯。

47. 你老闆唔係要你做野快，係要你做野準時又交帶　
唔快又點準時呢

48. 你老闆年紀唔大，公司裡頭唔駛叫我渣生咁拘謹，叫我英文名 Tony
無問題，最緊要個洋文名不是那些西藥名般難讀就得；又或者唔好係八兩金的樣子，但要員工叫「AH Pacino(呀白痴佬？)怎樣怎樣」

49. 你老闆鍾意和諧, 咪埋堆搞黨派, 否則要你訓街
無問題，有同事以為我是啞的。

50. 你老闆講野含蓄, 叫你查找不足, 即係叫你切腹
得聖上賜死，謝主隆恩